Beş ildən sonra Azərbaycan kinosu yenidən Venesiyada səslənəcək! Hilal Baydarovun “Xütbə” trilogiyasının son filmi – “Boşluğa Xütbə” (Sermon to the Void) bu il Venesiya Film Festivalında dünya premyerasını edəcək.
Azərbaycan–Meksika–Türkiyə ortaq istehsalı olan ekran əsəri dünyanın sonunun yaxınlaşdığı bir zamanda Şah İsmayılın “dirilik suyu”nu tapmaq üçün çıxdığı səyahəti danışır. Filmdə Hüseyn Nəsirov, Məryəm Nağıyeva, Rəna Əsgərova, Elşən Abbasov və Orxan İskəndərli rol alıblar.
Ssenari müəllifi və rejissor Hilal Baydarovdur. O həm də filmin montaj və operator işini özü həyata keçirib. Musiqi Kənan Rüstəmliyə məxsusdur, səsləndirmə və montaj isə beynəlxalq mütəxəssislərin iştirakı ilə gerçəkləşdirilib.
“Boşluğa Xütbə” həm mövzusu, həm də estetik dili ilə müasir Azərbaycan kinosunun dünya miqyasında öz sözünü deməyə başladığını göstərir. Venesiya Film Festivalı kimi nüfuzlu bir səhnədə premyera isə bu uğuru daha da əlamətdar hadisəyə çevirir.