Hollivudun məşhur aktrisası Ancelina Coli yeni filmi Couturenun nümayişindən sonra keçirdiyi müsahibədə 2007-ci ildə xərçəngdən vəfat edən anası Marşelin Bertranı xatırlayaraq duyğusal anlar yaşayıb.
Aktrisa anasının ona yazdığı məktubları yada salaraq göz yaşlarını saxlaya bilməyib: “O rollarıma məktublar yazardı – Sevgili Ciya, Sevgili Liza Rou, Sevgili Lara Kroft… 16 ildir ki, o məktubları almıram. Bu mövsüm də mənə həmişə anamı xatırladır”.
Müsahibə zamanı Coli əlavə edib ki, film çəkilişlərində anasının boynunda olan boyunbağını taxıb: bu, ona anasının yanında olduğunu hiss etdirməyə kömək edib. “O boyunbağı mənə anamın yanında olduğunu hiss etdirdi” – deyə aktrisa vurğulayıb.
Marşelin Bertran 1999-cu ildə yumurtalıq xərçəngi, daha sonra isə süd vəzi xərçəngindən əziyyət çəkmiş və 2007-ci ildə 56 yaşında vəfat etmişdi. Ancelina Coli, anasının vəfatından sonra xərçəng riskini azaltmaq üçün mastektomiya və uşaqlığın çıxarılması əməliyyatı etdirib. Bu addım tibbdə “Ancelina Coli effekti” kimi tanınıb və minlərlə qadının genetik test etdirməsinə ilham verib.
Yeni filmində Coli, süd vəzi xərçəngi və şəxsi itkilərlə mübarizə aparan bir obrazı canlandırır. Rejissor Elis Vinukur aktrisanın şəxsi təcrübələrinin rola dərinlik qatdığını bildirib.