Azərbaycanın “Uşaq Avroviziya 2025” təmsilçisi müəyyənləşib. Gürcüstanın paytaxtı Tbilisidə keçiriləcək müsabiqədə ölkəmizi 12 yaşlı istedadlı ifaçı Yağmur təmsil edəcək. Bu barədə məlumat İctimai Televiziya və Radio Yayımları Şirkətinin təşkil etdiyi mətbuat konfransında açıqlanıb.
Seçim prosesi iki mərhələdən ibarət olub. Əvvəlcə 60-dan çox müraciət arasından 15 iştirakçı canlı dinləməyə dəvət edilib. Daha sonra münsiflərin qərarı ilə Yağmur böyük üstünlüklə qalib gələrək Azərbaycanı təmsil etmək hüququ qazanıb.
Münsiflər heyətində Xalq artisti Siyavuş Kərimi, bəstəkarlar Gövhər Həsənzadə, Vüqar Camalzadə, Yaşar Baxış, müğənni Samirə Əfəndi və rejissor Cavid İmamverdiyev yer alıblar.
2013-cü ildə doğulan Yağmur 8 yaşından musiqi ilə məşğuldur. O, hazırda 5 nömrəli Uşaq İncəsənət Məktəbinin 3-cü sinif şagirdidir. Estrada, pop və klassik musiqiyə maraq göstərən gənc ifaçının sevimli sənətçiləri arasında Michael Jackson, Billie Eilish, Jennie (Blackpink), Aygün Kazımova və Aybəniz Haşımova var.
Seçimin nəticəsi Yağmur üçün böyük sevinc olub:
“Azərbaycanı Tbilisidə təmsil etmək mənim üçün inanılmaz təcrübə olacaq. Çox xoşbəxtəm.”
Onun anası da qızının uğurunu qürurla qeyd edib:
“Musiqiyə sevgim hər zaman Yağmura motivasiya verib. İndi onun arzularının gerçəkləşməsini görmək ailəmiz üçün böyük fəxrdir.”
Xatırladaq ki, “Uşaq Avroviziya 2025” 13 dekabrda Tbilisidə keçiriləcək. Bu mötəbər yarışma Avropanın ən istedadlı uşaqlarını bir araya gətirir, mədəniyyətlərarası dialoqa töhfə verir və gənc ifaçılara beynəlxalq tanınma imkanı yaradır. Azərbaycanın iştirakı isə həm gənc istedadlarımızın təcrübə qazanmasına, həm də milli musiqimizin dünyada tanıdılmasına xidmət edəcək.