Azərbaycanı bu il Uşaq Avroviziyası 2025 müsabiqəsində gənc və istedadlı ifaçı Yağmur təmsil edəcək. Onun 13 Dekabr Tbilisidə baş tutacaq müsabiqədə səsləndirəcəyi mahnı “Miau Miau” adlanır.
Mahnı qəhrəmanın özünə olan inamından, daxili gücündən, sevincdən, rəqs səhnəsində necə parlamağından və təbii ki, bizim kiçik dostlarımız pişiklərdən bəhs edir.
Mahnının bəstəkarı; Mila Miles, Dihaj, Rüstəm Rzayev, Hafiz Baxış
Sözlər; Mila Miles
Miks & Mesterinq; Rüstəm Rzayev
Yağmurun vokal hazırlığı Avroviziya seqmentində tanınmış müğənni Mila Miles tərəfindən aparılır, səhnə konsepti isə beynəlxalq səviyyəli rejissor Mads Enggaard tərəfindən hazırlanacaq.
Yağmurun seçimi iki mərhələli milli seçim prosesinin nəticəsi olaraq müəyyən olunub. İlkin mərhələdə 60-dan çox müraciət arasından 15 finalçı seçilib. Bu mərhələdə aşağıdakı münsiflərin səsləri əsas götürülüb:
- Gülnaz İsmayılova – Xalq Artisti
- Kamran Tağızadə – “12xal” Avroviziya bloqunun üzvü
- Azad Şabanov – Müğənni
- Rilaya – Müğənni
- Humay Aslanova – Vokal müəllimi, ifaçı
İkinci mərhələdə qalib, daha geniş peşəkar münsiflər heyəti tərəfindən seçilib:
- Siyavuş Kərimi – Xalq artisti, bəstəkar
- Gövhər Həsənzadə – Əməkdar artist, bəstəkar
- Vüqar Camalzadə – Əməkdar artist, bəstəkar
- Samirə Əfəndi – Müğənni, Azərbaycanın Uşaq Avroviziyası 2020–2021 təmsilçisi
- Yaşar Baxış – Bəstəkar və aranjimançı
- Cavid İmamverdiyev – Baş rejissor, Azərbaycan Dövlət Akademik Musiqili Teatrı
Münsiflərin yekdil qərarı ilə Yağmur qalib elan olunub və ölkəmizi Uşaq Avroviziyası 2025-də təmsil etmək hüququ qazanıb.
Qeyd edək ki, Azərbaycan bu layihədə indiyədək dörd dəfə iştirak edib. Sonuncu dəfə 2021-ci ildə Sona Əzizova “One of Those Days” mahnısı ilə ölkəmizi təmsil etmiş və 19 ölkə arasında 5-ci yer tutaraq Azərbaycan üçün ən yüksək nəticəyə imza atmışdı.