Sevdaliza 2025-ci ilin payızında üçüncü studiya albomu “Heroina”nı təqdim etdi. Albomu sənətçinin son illərdəki ən fərqli işlərindən biri saymaq olar, çünki, “Heroina”da Sevdaliza latın musiqisi, elektron sədalar və alternativ pop üslubunu birləşdirərək öz musiqi xəttinə yeni istiqamət verdi. Albomun əsas mövzusu qadın gücü, şəxsiyyətin azadlığı və emosional dayanıqlıq üzərində qurulub və 13 mahnıdan ibarətdir. Hər bir əsər fərqli qadın hekayəsini və daxili mübarizəni təsvir edir. *“Alibi”*, “Ride or Die”, “Heroina”, və “Femme Fatale” kimi mahnılar albomun əsas ruhunu əks etdirir. Ötən il yayımlanan və yetərincə məşhurlaşan “Alibi” “reggaeton“ və “funk“ elementləri ilə dinamik səslənir. “Heroina” mahnısı isə daha dərin emosional tonlara malikdir. Albomun bəstəkar və prodüser heyətinə Mathias Yanmet, Adam Vadel və Sevdaliza özü daxildir.
“Heroina” həmçinin bir sıra beynəlxalq ifaçılarla əməkdaşlıq layihələrini də təqdim edir. Albomda La Yoaqui, Pabllo Vittar, və Yseult kimi adlarla duetlər yer alıb.
Sevdalizanın bu layihə ilə özünü yalnız Avropa elektron səhnəsində deyil, Latın Amerikası bazarında da tanıtmağı hədəflədiyini görürük.
Albomun təqdimatı üçün geniş promosiya həyata keçirilib. Sevdaliza “Heroina World Tour” adlı konsert seriyasına başlayıb və ilk çıxışı Amsterdamda gerçəkləşib. Sosial mediada albom üçün yaradılan “#BeYourOwnHeroina” hərəkatı qadın gücünü vurğulamaq məqsədi daşıyır. Kliplərin rejissorluğunu Tanu Muino edib, vizual konsepsiya isə qara-ağ tonlarda minimalist və simvolik tərzdə hazırlanıb.
Tənqidçilər “Heroina”nı Sevdalizanın ən əlçatan, amma eyni zamanda dərin emosional albomu kimi dəyərləndirirlər. Albom həm musiqi, həm də ideya baxımından sənətçinin əvvəlki işlərindən – “Ison” və “Shabrang”dan – daha rəngarəng və cəsarətli sayılır. Dinləyicilər isə “Heroina”nı Sevdalizanın özünü yenidən kəşf etdiyi bir mərhələ kimi dəyərləndiriblər.
Xatırlayaq ki, Sevdaliza Fiftysix Magazine-in üçüncü buraxılışının üzü idi. Jurnalı oxumaq üçün buraya daxil ola bilərsiniz.