Yaponiyada böyük izləyici kütləsi qazanan və “Tokyo Broadcasting System Television” tərəfindən istehsal olunan “VIVANT” serialının ikinci mövsümünün çəkilişləri Azərbaycanda həyata keçirilib. Serial hazırda Netflix platformasında yayımlanır və böyük beynəlxalq maraq görür.
Layihənin Azərbaycandakı tərəfdaşı “Bakı Media Mərkəzi” olub. Çəkilişlər avqust ayında başlayıb və oktyabrın sonunda yekunlaşıb.
Yeni mövsümün çəkilişləri təkcə Bakıda deyil, həm də Gəncə, Şəki, Naxçıvan, Sumqayıt, Şamaxı, Qəbələ və Quba da daxil olmaqla bir çox şəhərdə aparılıb. İkinci mövsümün əsas səhnələrindən biri isə Gəncədə lentə alınıb.
Serialın ilk mövsümü 60 milyondan çox tamaşaçı tərəfindən izlənərək böyük uğur qazanmışdı.
“VIVANT”ın yeni mövsümünün 2026-cı ildə yayımlanacağı gözlənilir.