ABŞ-nin nüfuzlu “USA News” nəşri azərbaycanlı musiqiçi, caz pianoçusu və bəstəkar Mehdi Rzayev haqqında məqalə dərc edib. İfaçı Karan səhnə adı ilə tanınır və innovativ yaradıcılığı ilə diqqət çəkir.
Məqalədə qeyd olunur ki, Karan caz improvizasiyalarını elektron və multikultural elementlərlə birləşdirərək qlobal musiqi səhnəsində qısa müddətdə unikal sima kimi tanınıb. Onun kompozisiyaya və ifaya fərqli yanaşması dünya miqyasında böyük maraq doğurub.
Nəşrin məlumatına görə, Karan artıq beynəlxalq miqyasda uğurlara imza atıb. Belə ki, o, üç dəfə ABŞ-də keçirilən “Djooky Music Awards” beynəlxalq müsabiqəsində “Ən yaxşı caz pianoçusu” seçilib və bir sıra nüfuzlu mükafatlara layiq görülüb. 120-dən çox ölkədən iştirakçının qatıldığı müsabiqələrdə özünəməxsus üslubu və texniki ustalığı ilə seçilən Karan, dünyanın ən yaxşı musiqiçiləri arasında yerini möhkəmləndirib.
Məqalədə həmçinin vurğulanır ki, ifaçının musiqisi “Spotify”, “Apple Music” və “YouTube” kimi əsas rəqəmsal platformalarda geniş rezonans doğurub. Qlobal musiqi arenasında populyarlığı sürətlə artan Karan, öz köklərinə sadiq qalmaqla yanaşı, mədəni və stilistik sərhədləri aşaraq dünya musiqi səhnəsinə təsir göstərir.