Pop mədəniyyətində trend olmaq Çarli XCX üçün təbii bir haldır, amma bu dəfə o yeni sinql və ya albom yayımlayıb trend olmağı yox, ikinci dəfə toy mərasimi keçirməklə bunu edir. Çox qəribə səslənsə də, biz bu halı adətən albomun digər versiyaları və ya mahnıların duet, yeni janr və.s versiyaları ilə ikinci bir nəfəs verilməsi kimi görmüşük. Amma söhbət Çarlidən gedirsə, qeyri-adi deyə biləcəyimiz daha nələr görə bilərik…
Onlar həyat yoldaşı George Daniel ilə 2022-ci ildə münasibətlərinin olduğunu açıqlamışdılar. Ehtimal olunur ki, bu münasibət 2021-ci ildə əməkdaşlıq etdikləri “Spinning” mahnısından sonra yaranıb. 2023-cü ildə nişanlanan cütlük nəhayət bu il artıq evlidir.
Çarli və Georgenin ilk toyu Londonda, “Hackney Town Hall”da, iyulun 19-da baş tutmuşdu. İlk toy minimalist, sadəcə 20 nəfərlik yaxınlardan ibarət qonaqlarla birlikdə baş tutdu. Sanki bu toy yox, toydan sonra ailə üzvləri ilə “afterparty” idi. Yəqin ki, Çarli və George bu toydan əvvəl qonaqları və dostları ayrı toylara dəvət etmək qərarına gəliblər. Yoxsa, bir toya sadəcə qohumları çağırmaq dostları məyus edərdi.
Nəhayət ikinci toy İtaliyanın günəşli sahillərində – Siciliya adasında daha romantik aurada və dostlarla birlikdə baş tutdu. Sanki, Çarli bir az da “Spotify playlist”ləri kimi, əvvəl “chill vibes”, sonra isə “summer rave” təəssüratı yaşayır.
İkinci toyun qonaqları arasında Troy Sivan, Georgenin də üzvü olduğu “The 1975” qrupunun üzvləri, Devon Li Karlson, Qabriett və.s var idi, hətta Matti Heili DJ-likdə etdiyi deyilir. Həmçinin, toya Dua Lipanın da dəvət olunduğu məlumdur, amma rəsmi açıqlamaya görə Dua təqviminin dolu olmasını əsas göstərərək toya qatıla bilməyib. Fanatlar isə bunun səbəbini gizli rəqabət olaraq görür. Bəlkə də… Amma daha bir neçə ay öncə Dua Lipanın “Radical Optimism” turunun Londonda, “Wembley” stadionundakı konsertində pop ulduzlar birlikdə səhnə alaraq “365” ifa etdilər. Bəlkə də bu çıxış şayiələri aradan qaldırar.
Hər şeyin fərqli olduğu toylarda geyimlər eyni ola bilərmi? Əlbəttə, yox! O zaman gəlin baxaq, Çarli və George nə geyinmişdi?
İlk toyda Çarli klassik “Vivienne Westwood” mini donu və qısa voile ilə sadə geyimi üstün görmüşdü. George isə tünd rəng kostyum, qara ayaqqabı və ağ köynəklə kombinə olunmuş geyimdə idi.
İkinci toyda isə “Danielle Frankel” imzalı ipək şifon gəlinlik, barok incilər və uzun quyruq, Çarlini sanki qədim italyan filmlərindən çıxmış kimi göstərirdi. George isə açıq rəng kostyumla yay ab-havası yaradırdı.
Toyun əvəzolunmaz elementi isə musiqidir. Bəli bu hər yerdə belədir. Çarlinin toyunda musiqi seçimi deyəndə ağlımıza onun öz stili gəlir və bu doğrudur. “Vroom Vroom”, “Speed Drive”, “Used to Know Me” ilə davam edən gecənin sonunda isə “Boom Clap” kareoke oxunması qonaqlara əsl Çarli vaybı yaşatdı.
Təsəvvür edin, Çarli “Brat” albomundan sonra dünyada yeni bir trend dalğası yayır və evlənən cütlüklər ikinci toy mərasimi keçirməyə başlayırlar. Niyə də yox? Axı toy sadəcə evlənmək yox, yaxınlarla, dostlarla bu anı ən gözəl şəkildə yaşamaqdır.
İndi hamının ağlında digər bir sual var – Çarli üçüncü toy haqqında düşünür? – bunu da zaman göstərəcək.
Əziz Fiftysix izləyiciləri, şərhlərdə fikirlərinizi bölüşün: Bəs siz gələcəkdə ikinci toy mərasimini keçirməyi planlaşdırırsınız?