Drake adını bu dəfə musiqi siyahılarında deyil, məhkəmə sənədlərində görürük. Dünyanın ən çox dinlənilən reperlərindən biri indi “saxta dinləmələr” qalmaqalının mərkəzindədir.
ABŞ-da təqdim olunan iddiaya görə, Spotify-da Drake-in mahnıları illərdir “botlar” və şübhəli hesablar vasitəsilə süni şəkildə dinlənib. Yəni milyonlarla, bəlkə də milyardlarla “play” real dinləyici yox, avtomatlaşdırılmış sistemlər tərəfindən yaradılıb. İddiaçılar deyir ki, bu, yalnız Drake-in populyarlığını deyil, həm də musiqi bazarındakı ədalətli rəqabəti ciddi şəkildə pozub.
Məhkəmə sənədlərində bildirilir ki, saxta dinləmələr nəticəsində digər sənətçilər maliyyə baxımından zərər çəkib. Spotify-da gəlirlər ümumi axın sayına əsasən bölündüyü üçün, Drake-in rəqəmlərinin süni artması digərlərinin payını azaldıb. “Bu, sadəcə bir reperin uğur hekayəsi deyil, sistemli manipulyasiyadır,” – deyə iddiaçılar bildirir.
Spotify öz növbəsində ittihamları rədd edir və bildirib ki, platformada saxta axınların qarşısını almaq üçün “inkişaf etmiş monitorinq sistemi” mövcuddur. Lakin iddiaçılar deyir ki, bu sistem ya işləməyib, ya da işləməməsi görməzlikdən gəlinib.
Drake-in komandası hələlik məsələ ilə bağlı açıqlama verməyib. Amma musiqi sənayesində artıq suallar səslənməyə başlayıb: “Axın” sisteminin bu qədər gəlir gətirdiyi bir dövrdə, biz dinlədiyimiz rəqəmlərə nə qədər inanmalıyıq?
Əgər ittihamlar sübutlansa, bu hadisə təkcə bir artistin reputasiyasını deyil, bütün “streaming” platformalarının iş prinsipini dəyişdirə bilər. Çünki bu dava artıq sadəcə Drake-in deyil rəqəmsal musiqinin etibar savaşıdır.
Mənbə: Billboard