Apple şirkəti ötən gün rəsmi olaraq təqdim etdiyi iPhone 17 Pro modelinin tanıtım kampaniyasında dünyaca məşhur ulduz Dua Lipa ilə əməkdaşlıq edib. Şirkətin rəsmi Instagram səhifəsində yayımlanan videoda sənətçinin “Radical Optimism” dünya turundan səhnəarxası kadrlar yer alıb.
Paylaşılan görüntülərin ən diqqətçəkən tərəfi isə onların tamamilə yeni iPhone 17 Pro ilə çəkilməsi olub. Videoda Lipa-nın səhnəyə hazırlaşdığı anlar, konsert atmosferi və şəxsi məqamlar izləyicilərə təqdim edilib. Bundan əlavə, ulduzun telefonun narıncı rəngli (Cosmic Orange) versiyası ilə selfi çəkdiyi fotolar da sosial mediada maraqla qarşılanıb.
Apple bu kampaniya ilə yeni modelin əsas üstünlüklərindən biri olan təkmilləşdirilmiş kamera imkanlarını ön plana çıxarıb. Xüsusilə həm arxa, həm də ön kameradan eyni anda yüksək keyfiyyətli video çəkilişi, daha güclü sensor sistemi və peşəkar çəkiliş formatları diqqət mərkəzindədir.
Paylaşım qısa müddətdə sosial şəbəkələrdə geniş rezonans doğurub. İstifadəçilər həm cihazın dizaynı, həm də Dua Lipa-nın layihədə iştirakı ilə bağlı müxtəlif rəylər bildiriblər.
Qeyd edək ki, Apple-ın məşhurlar ilə əməkdaşlıq ənənəsi var. Şirkət daha əvvəl də “Shot on iPhone” kampaniyası çərçivəsində müxtəlif sənətçilərlə birlikdə çalışaraq məhsullarının texniki imkanlarını nümayiş etdirib.