FIFA tarixində ilk dəfə final oyunu fasiləsində möhtəşəm bir musiqili şou təqdim olunacaq — səhnədə dünya ulduzları Doja Ket, Cey Balvin və Tems olacaq.
13 iyul 2025-ci ildə ABŞ-ın Nyu-Cersi ştatında yerləşən MetLife Stadionunda keçiriləcək 2025 FIFA Klub Dünya Çempionatının final oyunu təkcə futbolla deyil, həm də musiqi şousu ilə yadda qalacaq. FIFA bu dəfə ənənəni pozaraq fasilə zamanı — yəni “half-time”da — canlı konsert təqdim edəcək. Bu konsertin əsas ulduzları isə müasir musiqi səhnəsinin nəhəng adlarıdır: amerikalı pop-rap ulduzu Doja Ket, afrobit musiqisinin parlayan siması Tems və Latın musiqisinin qlobal səfiri Cey Balvin.
Bu möhtəşəm şou “Global Citizen” platforması ilə əməkdaşlıq çərçivəsində təşkil olunur və məqsəd dünya üzrə təhsil bərabərliyinə dəstək məqsədilə 100 milyon dollar vəsait toplamaqdır. Layihənin yaradıcısı isə məşhur britaniyalı musiqiçi, “Coldplay” qrupunun solisti Kris Martindir.
Müğənnilər çıxışlarına görə olduqca həyəcanlıdır. Cey Balvin bu fürsəti belə qiymətləndirib:
“Medellindən MetLife stadionuna — bu sadəcə mənim üçün yox, Latın musiqisi üçün tarixi bir andır.”
Tems isə bildirib ki, bu layihə onun üçün yalnız musiqi deyil, həm də sosial məsuliyyətdir:
“Dünyada təhsilin gücü ilə uşaqların gələcəyini dəyişmək mümkündür. Bu səhnədə olmaq mənim üçün şərəfdir.”
Doja Ket də bu il “Global Citizen Festival”da çıxış edərək artıq bu təşəbbüsə dəstəyini göstərmişdi.
Final qarşılaşmasında Real Madrid, Bayern Münhen, Paris Sen-Jermen, İnter Mayami və digər güclü klubların mübarizəsi gözlənilir. Bu isə o deməkdir ki, həm futbol, həm də musiqi baxımından dünya səviyyəli bir gecə bizi gözləyir.
Mənbə: Billboard.com
