Musiqi dünyasının əsas mükafatının, ifaçılardan fanatlara qədər hər kəsin səbirsizliklə gözlədiyi Qremmi namizədləri bəllidir. İllərdir səhnəyə damğasını vuran məşhur ifaçılar, yenicə parlayan ulduzlar və bəstəkarlar fərqli kateqoriyalar üzrə qalibiyyət üçün yarışacaqlar.
Hər bir dünya ulduzu yeni mahnısını, albomunu sanki bu mükafat üçün – hədəf Qremmi qazanmaqdır – deyərək hazırlayır. Kimisi bunu bacarır, kimisi son anda qalibiyyəti əldən verir, kimisi isə beş, yeddi namizəddən ibarət siyahıya daxil ola bilməməyin məyusluğunu yaşayır. Lakin bu Qremmidir, dünyanın ən əsas musiqi mükafatıdır, Əlbəttə namizəd olmaq da, qalib olmaq da asan olmayacaq. Bu ilki siyahıya baxanda sanki, ötən ilki ifaçıların yenidən yarışdığı bir müsabiqə hissiyatı yaranır. Ledi Qaqa, Doeçi, Billi Ayliş, Kendrik Lamar, Sabrina Karpenter, Çappel Roan və digərləri… İfaçılar eyni, əsərlər fərqli. Amma bu təbiidir. Günümüzdə musiqi platformalarında da ən çox dinlənilən ifaçılar olaraq, bunu onların növbəti uğuru adlandırmaq olar. Hələ siz də onlardan birinin fanatısınızsa, yəqin ki, sevincinizin həddi hüdudu yoxdur.
Əsərlərə baxsaq həmişəki kimi pop janrında üstünlük təşkil edir. Baxmayaraq ki, digər bir neçə janrın öz kateqoriyası var, əsas kateqoriyalar əsasən pop janrındaki mahnılardan ibarətdir. Bu ilin əsas kateqoriyaları – “İlin mahnısı”, “İlin albomu”, “İlin səsyazması” – üzrə nə Biyonse nə də Teylor Svift yarışmayacaq. Deyəsən onlar mükafat almaqdan yorulub, bu il üçün yaradıcılıq fəaliyyətlərini müvəqqəti asqıya alıblar. Biyonse bu il dünya turuna, Teylor isə yeni albomu “Showgirl”-ə fokuslanıb. Növbəti il onlardan birini ya da elə hər ikisini də siyahıda görməmək çətin ola bilər. Baxmayaraq ki, “Showgirl” əvvəlki albomlardan fərqli olaraq müxtəlif reaksiyalar, tənqidlərlə qarşılandı. Nə isə… Bu barədə növbəti ilin namizədlədi açıqlananda danışa bilərik. Gəlin indi kateqoriyalarda kimlər var nəzər yetirək.
İlin mahnısı üçün;
Billi Ayliş – “Wildflower”
Ledi Qaqa – “Abracadabra”
Roze & Bruno Mars – “APT.”
Bad Banni – “DtMF”
Kendrik Lamar feat. SZA – “luther”
Sabrina Karpenter – “Manchild”
Doeççi – “Anxiety”
Qreysi Abrams – “Close to You”
yarışacaq. Bu kateqoriyada qalibi təxmin etmək heç də asan deyil. Bilmirsən Ledi Qaqa yoxsa Bruno Mars və Roze dueti. Ötən il bu ikilini (Ledi Qaqa və Bruno Mars) birlikdə “Die with a Smile” ilə qalib olarkən gördük. Yoxsa onlardan heç biri, qalib elə Billi Ayliş olacaq? Yoxsa digərləri?
“İlin Albomu” kateqoriyasında isə;
Bad Banni – “DeBÍ TiRAR MáS FOToS”
Castin Biber – “SWAG”
Sabrina Karpenter – “Man’s Best Friend”
Leydi Qaqa – “MAYHEM”
Kendrik Lamar – “GNX”
Klips (Puşa Ti & Malis) – “Let God Sort Em Out”
Tayler, the Creator – “CHROMAKOPIA”
Leon Tomas – “MUTT”
yarışacaqlar. Qalibin Ledi Qaqa olacağını təxmin edə bilərik. Hansı ki, bu albomda ötən ilin ən sevilən mahnılarından biri, həmçinin Qremmi qazanan mahnısı var. Digər bir mahnı isə bu il “İlin mahnısı” kateqoriyasında namizəddir. Bu qədər güclü bir albomun qalib olmaması gözlənilməz olar.
“İlin Səsyazması” üçün;
Billi Ayliş – “Wildflower”
Ledi Qaqa – “Abracadabra”
Roze & Bruno Mars – “APT.”
Bad Banni – “DtMF”
Kendrik Lamar feat. SZA – “luther”
Sabrina Karpenter – “Manchild”
Doeççi – “Anxiety”
Post Meloun – “Devil You Know”
namizəddir. Siyahı demək olar ki, “İlin mahnısı” ilə eynidir. Sadəcə Qreysi Abrams yerinə Post Meloun var. Bu kateqoriyada ifaçılar sanki – “İlin mahnısı mükafatını ala bilmədim, heç olmasa bunu alaram” – deyə yarışacaq. Əlbəttə qazanan yalnız bir mahnıdırsa, rəqabət çox güclü olacaq. Ümid edək, hər iki kateqoriyada fərqli mahnılar qalib olar. Axı biz bu mahnıları dinləyərək fərqli emosiyalar yaşamışıq və zövq almışıq, hər biri qalibiyyətə layiqdir!
İlin yeni ifaçısı!
Oliviya Din
“Katsaye”
The Marias
Addison Rey
sombr
Leon Tomas
Aleks Varren
Lola Yanq
Budur, yeni ifaçılar Qremmi səhnəsinə daxil olur. Son illərdə adını daha çox hallandırmağa başlayan bu ifaçılar ilin yeni ifaçısı üçün yarışacaq. Ötən il Çarli XCX ilə “Von Dutch” mahnısında duet ortağı olan Addison Rey bu il yeni albomu və mahnıları ilə sevənlərinin sayını artırır və Qremmi üçün gəlir!
Aleks Varren bu il adını ən çox eşitdiyimiz yeni adlardandır. “Ordinary” və “Bloodline” kimi hitlər sayəsində onun yolu Qremmi səhnəsindən keçəcək. Nə bilmək olar, bəlkə də qalib elə Aleks Varren olacaq.
Altı qızdan ibarət “Katseye” isə bu il ən çox adını eşitdiyimiz qruplardan biri idi. Yeni yaranan qrupun Qremmi namizədi olmasını böyük uğur saymaq olar.
20 yaşlı Sombr isə “Back to Friends” və “Undressed” mahnıları ilə beynəlxalq arenada səs saldı. Hətta “Spotify”da “Back to Friends” artıq bir milyard dəfədən çox dinlənilib. Görək, bu gənc ifaçı Qremmini qazana biləcək mi?
Düşünürəm ki, nəzər yetirdiyim ifaçılardan biri ilin yeni ifaçısı adını qazanacaq.
Digər kateqoriyalar üzrə namizədləri isə Qremmi Mükafatlarının rəsmi təqdimat video-çarxında izləyə bilərsiniz. Fikirləriniz maraqlıdır. Qalibiniz kimdir? Bizimlə bölüşməyi unutmayın.