İranda musiqi çox vaxt sadəcə sənət deyil, həm də etiraz, bir ümid işığıdır. Şervin Hacıpur bu işığın ən parlaq simalarındandır. 1997-ci ildə Mazandaran bölgəsində doğulan Şervin uşaq yaşlarından musiqiyə maraq göstərib, klassik İran melodiyalarını Qərb popu ilə birləşdirərək özünəməxsus üslubunu yaratdı. İlk böyük diqqəti “New Era” televiziya yarışmasında çəkdi, amma əsl şöhrəti 2022-ci ildə yayımladığı “Baraye” ilə gəldi.
Mahnı əsasən Mahsa Amini hadisəsi ilə bağlı yaranan narazılıqlar və etirazlara işıq tuturdu. Mahsa Amini hicab qaydalarına əməl etmədiyi iddiası ilə polisin saxlamasından sonra vəfat etmişdi. “Baraye” sadəcə bir mahnı deyildi; İran gənclərinin boğulmuş arzularının və susdurulmuş səsini dünyaya çatdıran bir fəryad idi. Hər misrası bir “nəyə görə mübarizə aparırıq?” sualına cavab idi: qadınlar üçün, azadlıq üçün, həyat üçün. Mahnının sosial mesajı açıq və güclüdür: qadın hüquqları, insan azadlığı və ədalət uğrunda mübarizə birləşdirici, hər kəs üçün ilhamverici olmalıdır. Mahnı sosial şəbəkələrdə sürətlə yayıldı, milyonlarla insana çatdı və qlobal bir simvola çevrildi. Senzura və həbs qorxusu Şervini geri çəkə bilmədi; əksinə, səsi daha da ucaldı.
“Baraye” mahnısı 2023-cü ildə Qremi mükafatında “Ən yaxşı sosial mesajlı mahnı” nominasiyasını qazandıqda, bu təkcə şəxsi uğur deyildi – həm də bütün İran gəncləri üçün simvolik bir qələbə oldu. Mahnının sözləri və mesajı, uzun illər susdurulmuş səsin dünya səhnəsində eşidilməsini təmin etdi. Cill Bayden mükafatı təqdim edərkən vurğulamışdı ki, bu mahnı qadınların hüquqları, azadlıq və ədalət uğrunda mübarizənin ritmini təmsil edir. Qreminin bu qərarı, musiqinin siyasəti dəyişdirmək və sosial haqları görünən etmək gücünü bir daha sübut etdi. Şervin artıq təkcə İranın deyil, bütün dünyanın vicdanının səsi olaraq tanınır.
2024-cü ildə yayımlanan “Ashghal” ilə o, cəmiyyətin kənara atdığı insanların səsini təkrar eşitdirdi. Özünü “zibil” adlandıraraq, məzlumların, kənara itələnənlərin və səsi kəsilənlərin yerinə qoydu. Mahnının hər misrası həm şəxsi ağrının, həm də ictimai tənqidin poetik ifadəsi idi:
“Bu şəhəri tərk etmə demə mənə, hara getsəm də, ürəyim buradadır…”
Bu mahnıda ayrıca bir mesaj da gizlidir: “Tanrı bir zibilləri də sevir.” Bununla hər kəsin, hətta kənara atılanların və görməzdən gəlinənlərin də dəyərli olduğunu, insanlıq və sevginin heç kimdən əsirgənmədiyini göstərir.
O, musiqisində insanlıq, fərqlilik və azad düşüncə ön plandadır. Onun mesajı sadədir: insan olmaq hər şeydən öncə gəlir. Videolarında və səhnə tərzində azadlıq və birlik simvolları incə, üstüörtülü şəkildə əks olunur, hər baxış və hər sükutla bir hissiyyat yaradılır.
1 mart 2024-cü ildə Hacıpur hökumət əleyhinə təbliğat apardığına görə səkkiz ay, həmçinin “milli təhlükəsizliyi pozmaq məqsədilə ictimaiyyəti iğtişaşlara təşviq və təhrik etmək” ittihamı ilə üç il olmaqla, ümumilikdə dörd ilə qədər həbs cəzasına məhkum edildi.
31 iyul 2024-cü ildə Şervin Hacıpur “Instagram” hesabında bir video paylaşaraq, məhkəmə qərarının artıq qüvvəyə mindiyini və yaxın üç gün ərzində özünü həbsxanaya təslim olmalı olduğunu açıqladı.
Lakin 23 sentyabrda Hacıpur əfv aldığını və azadlığa buraxıldığını elan etdi.