“Italian brainrot” 2025-ci ilin əvvəlində internetdə yayılan, həm gülməli, həm də bir az qəribə bir trendlər dalğasıdır. Bu axımda süni intellektlə yaradılmış qəribə personajlar var — məsələn, başında kapuçino fincanı olan balerina və ya Nike ayaqqabısı geymiş köpəkbalığı. Bu personajlara “Tralalero Tralala” və “Ballerina Cappuccina” kimi italyan səslənişli adlar verilir. Videolarda isə mənasız, amma maraqlı italyanca cümlələr səsləndirilir.
Trendin haradan başladığı dəqiq bilinmir, amma 2023-cü ilin sonlarında aktyor Dwayne Johnson haqqında hazırlanan italyanca yazılı komik videolar bu axımın başlanğıcı sayılır. Qısa müddət sonra TikTok və digər sosial şəbəkələrdə hər kəs öz “italyan tərzində” qəribə personajlar düzəltməyə başladı və internet bu məxluqlarla doldu.
Bu fenomen o qədər böyüdü ki, artıq yalnız internetlə məhdudlaşmır. İndi “brainrot” personajlarını kolleksiya kartlarında, mobil oyunlarda, hətta bəzi uşaqlar üçün çəkilmiş cizgi filmlərində də görmək olur. Amma bu qədər populyarlığın arxasında ciddi bir problem də var: bu məzmunlara əsasən uşaqlar baxır. Onlar nə dediklərini anlamadan həmin italyanca və ya qarışıq sözləri təkrar edirlər. Bəzən isə bu cümlələrdə dini, siyasi və ya cinsi məzmun olur. Beləliklə, bu cür videolar uşaqların davranışına və düşüncəsinə mənfi təsir göstərə bilər.
İndi isə bu trenddə ən çox tanınan beş “brainrot” personajına baxaq:
1) Tung Tung Tung Sahur
Əlində çomaq tutan bu obraz adətən mehriban kimi görünür, amma əsəbiləşəndə çox aqressiv olur. Onu qəzəbləndirən hər kəs çomağın zərbəsini dadır. Bu tip videolar uşaqlarda şiddətə meyli artıra bilər.
2) Espresso Signora
Başında espresso fincanı olan bu qadın siqaret çəkir, insanlara pislik edir və bəzən “uşaq oğurlayan” kimi göstərilir. Uşaqlar üçün belə bir obrazın izlənməsi düzgün deyil, çünki bu, mənfi davranışları normallaşdırır.
3) Ballerina Capuccino
Bu, daha pozitiv və mehriban bir personajdır. Daim gülümsəyir, sakit təbiətlidir və uşaqlar arasında ən çox sevilən obrazlardan biridir.
4) Bombardino Crocadilo
Kərtənkələ başlı, təyyarə bədənli bir məxluqdur. Bombalarla uçur və hər yeri dağıdır. Çox zaman mənfi obraz kimi təqdim olunur.
5) Brr Brr Patapim
Bu personaj həm insan, həm div, həm də ağaca bənzəyir. Meşədə yaşayır və ormanı qorumaqla məşğuldur. Görünüşcə qorxunc olsa da, əslində təbiəti qorumaq istədiyi üçün bəzən müsbət obraz kimi göstərilir.
Beləliklə, “Italian brainrot” bir tərəfdən gülməli və əyləncəlidir, digər tərəfdən isə uşaqlar üçün təhlükəli ola bilər. Parlaq rənglər, qəribə səslər və italyan aksenti ilk baxışda sadəcə oyun kimi görünür, amma onların arxasında uşaqların şüuruna təsir edən gizli mesajlar da ola bilər. Buna görə də bu videolara baxarkən diqqətli olmaq vacibdir.