Məşhur amerikalı reper Kardi Bi yeni albomu ilə bağlı diqqətçəkən addım atıb. Sənətçi Nyu-York küçələrində pərəstişkarlarına yaxın olaraq “Am I The Drama?” adlı albomunun vinil və CD versiyalarını şəxsən təqdim edib.
Sosial şəbəkələrdə yayılan görüntülərdə ifaçının albom nüsxələrini yerə düzərək satdığı görünür. Kardi Bi zarafatla “Mənim leyblım dedi ki, küçələrə çıxıb albom satmalıyam” sözlərini qeyd edərək, aksiyanı özünəməxsus üslubda təqdim edib.
Bu təşəbbüs hip-hop mədəniyyətində əvvəllər rast gəlinən ənənəyə – reperlərin küçələrdə miksteyp sataraq tanınmasına bənzədilib.
Əlavə olaraq, Kardi Bi albomun xüsusi “Courtroom Edition” adlı məhdud buraxılışını da təqdim edib. Bu versiyada onun son məhkəmə prosesində viral olmuş fotoları və ifadələri üz qabığında əks olunub. Bu addım pərəstişkarları tərəfindən yaradıcı marketinq yanaşması kimi dəyərləndirilib.
Yeni albom ümumilikdə 23 trekdən ibarətdir. İndiyədək təqdim olunan “Outside” və “Imaginary Playerz” adlı singllar musiqisevərlərdən böyük maraq görüb. “Outside” Apple Music-də birinci pilləyə yüksələrək Kardi Binin son illərdəki ən uğurlu çıxışlarından biri olub.
Qeyd edək ki, “Am I The Drama?” albomu 2018-ci ildə Grammy mükafatına layiq görülmüş “Invasion of Privacy” albomundan sonra ifaçının təqdim edəcəyi ilk studiya albomudur. Onun rəsmi buraxılış tarixi 19 sentyabr 2025-ci il olaraq açıqlanıb.