Beşinci buraxılışın üzü MARI-dir və o, ağıllarda sadəcə ifaçı yox, həm də bəstəkar və söz yazarı kimi iz buraxıb. Onun haqqında artıq çox şey öyrənmişik. Bu dəfə düşündük ki, bir az da “songwriter” MARI-ni kəşf edək. İki dildə mahnı yazmaq asan deyil, bunun üçün kifayət qədər söz ehtiyatı olmalıdır. Və sözsüz ki, bunun əsas mənbələrindən biri də kitablardır. Biz də MARIdən hansı kitabları oxuduğunu soruşduq və o, sevimli kitablarından danışdı. Ən az beş-altı kitab sadalayacağını gözləsək də, bu MARI-dir – hər zaman ən yaxşısını seçib təqdim edən! Onun seçimlərinə sadiq qalaraq nəticədə üç kitabı sizə təqdim edirik. Ola bilsin, bu məqaləni oxuduqdan sonra siz də ən yaxın kitabxanaya gedib həmin əsərləri axtarasınız.
Musiqidən bir qədər uzaqlaşdığım anlarda ya yeni dillər öyrənirəm, ya idmanla məşğul oluram, ya da kitab oxumağa çalışıram. Daha çox şəxsi inkişaf, psixologiya və bioqrafiya janrında yazılmış, bir sözlə desək, “real” həyatdan ilhamlanan kitabları oxumağa üstünlük verirəm. Çünki düşünürəm ki, vaxtımı dəyərli və inkişaf etdirici məşğuliyyətlərə sərf etmək daha məqsədəuyğundur.
Sadaladığım kitabların hər biri həyatın fərqli tərəflərini açır və fikrimcə sizə də maraqlı olacaq:
It Didn’t Start With You – Elm tərəfindən sübut edilmiş faktlarla zəngin bu kitab etdiyiniz seçimlərin və atdığınız addımların əsl səbəblərini araşdırmağa kömək edir. Özümüzə aid bildiyimiz bəzi reaksiyalar və qərarlar bəzən düşündüyümüzdən daha dərin köklərə sahib ola bilir…
Loving You Without Losing Me – This one’s for my girlies 🤭 Ahh, biz qızlar… Bəzən həddindən artıq xəyalpərəst, həddindən artıq sevgi dolu oluruq. Amma unutmayaq ki, şəxsiyyətimiz və dəyərlərimiz hər şeydən öncə gəlməlidir! Bu kitab qadınların şəxsi həyatda üzləşdiyi problemlərə əsaslanaraq real hadisələr üzərindən yol göstərir. Məqsədi bizi “real” saxlamaq və münasibətlər içində özümüzü itirməməyimizə yardım etməkdir. Sevməyi bacaran, amma sevərkən itmək istəməyən hər qadın bu kitabı oxumalıdır.
From My Life: Poetry and Truth – Son vaxtlar tez-tez rastlaşdığım “Bu mahnını yazanda nə hiss edirdin?”, “Sözlər özün haqqındadırmı?” kimi sualların cavabını mən yox, Göte verir! 😅 Bu kitabda dahi bir insanın yaradıcılığının necə formalaşdığını, sənətinin onun həyatını nə qədər əks etdirdiyini, nələrin gerçək, nələrin isə poeziyanın yaratdığı uydurmalar olduğunu oxuyursunuz. Xüsusilə yaradıcı insanlar üçün dəyərli əsərdir, tövsiyə edirəm.
Hər bir kitab, MARI-nin də dediyi kimi, həyatın müxtəlif aspektlərini açır. Əgər artıq onun tövsiyələrindən ilham almısınızsa, boş vaxtınızı bu əsərləri oxumağa sərf edə bilərsiniz. Ola bilsin, bu sizin üçün kitabsevərliyə atılan ilk addım, yeni bir ilham mənbəyi olsun.
Amma unutmayın: kitablarla yanaşı jurnalları da oxumaq vacibdir. Beləliklə, MARI ilə Fiftysix Magazine-in beşinci buraxılışı artıq onlayndır və oxumaq çox vaxtınızı almayacaq. Kitabları tapana qədər metroda, işdə çay fasiləsində, evdə “nə edim” deyərək fərqlilik axtaranda saytımıza daxil olub 90 səhifəlik buraxılışı pulsuz oxuya bilərsiniz.