Moda dünyası bu gün bir dahini itirdi. Ciorcio Armani — sadəliyi zərifliklə, rahatlığı prestijlə birləşdirən, illərdir dəyişməyən bir üslubun müəllifi — 91 yaşında vəfat etdi. Onun yaradıcılığı yalnız geyimlərlə məhdudlaşmadı; Armani hər detalda estetik və funksionallığı birləşdirməyi bacarırdı.
Armani 1934-cü ildə Piacenza-da doğulmuş, əvvəlcə tibb sahəsində təhsil almışdı. Lakin taleyi onu modanın cazibəsinə gətirdi. 1975-ci ildə sevgilisi Serco Galeotti ilə qurduğu moda evi ilə yalnız geyim deyil, müasir zövqün və sadəliyin simvolunu yaratdı. Rikard Gere-in American Gigolo filmindəki görünüşü isə onu dünya səviyyəsində tanıtdı və qadın-kişi geyim anlayışını yenidən müəyyənləşdirdi.
Onun dizaynları minimalist, amma təsirli idi. Armani deyirdi: “Real insanlar üçün dizayn edirəm. Praktik olmayan paltarın heç bir dəyəri yoxdur.” Bu prinsip onun hər kolleksiyasında, hər blazerdə və hər t-shirtdə əks olunurdu. Sadə xətlər, neytral rənglər və rahat kəsimlərin arxasında zəriflik, özünə güvən və estetik intellekt dayanırdı.
Bu gün Armani yox, amma mirası yaşayır. Onun imperiyası — geyimdən parfümə, hotellerdən ev dekorasiyasına qədər — sadəliyin, zərifliyin və keyfiyyətin simvoludur. Moda dünyası onu yalnız dizayner kimi deyil, visioner və stil ikonu kimi xatırlayacaq. Culya Roberts, Viktoriya və Devid Bekhem kimi məşhurlar onun itkisini dərindən hiss etdiklərini ifadə etdilər: “Dünya bir əfsanəni itirdi.”
Ciorcio Armani bizə yalnız gözəl paltarlar vermədi; o, modanı bir həyat tərzi, sadəlikdə böyük estetik və özünü ifadə etmə yolu kimi təqdim etdi. Bugün onu itirsək də, onun yaratdığı üslub, prinsiplər və miras daim yaşayacaq. Minimalizm onunla əbədi bir simvol oldu, zəriflik isə heç vaxt solmayacaq.