Son bir il musiqi sənayesində yeni bir nəfəs kimi keçdi – albom satışlarında rekord qıran ifaçılar, vizual dili ilə musiqini tamamlayan iddialı video kliplər və sosial mediada trendə çevrilən əməkdaşlıqlar sənət dünyasının gündəmini formalaşdırdı. Bu axının ən mühüm dayanacaqlarından biri isə artıq qarşımızdadır: 2025 MTV Video Musiqi Mükafatları.
Nyu-York “UBS” Arenada reper və aktyor LL Kul Cey tərəfindən baş tutacaq mükafatlandırma gecəsi sadəcə qaliblərin elan olunduğu bir tədbir deyil, həm də musiqi sənayesində son bir ilin panoramasını təqdim edən qlobal bir platformadır.
İndi isə sizlərlə birlikdə həmin panoramaya nəzər salaq, hansı ulduzların bu il zirvəyə daha yaxın olduğunu analiz edək. Qalibiyyət şansı yüksək olan adları və şəxsi təxminlərimizi bölüşəcəyik.
Ən səs-küylü nominasiyalardan sayılan “İlin Artisti” adı uğrunda bu il yetəri qədər peşəkar adlar mübarizə aparır.
Namizədlər: Bad Banni, Biyonse, Kendrik Lamar, Ledi Qaqa, Teylor Svift, Morqan Uollen, The Uiknd
Düşünürük ki, qalib Ledi Qaqa olacaq.
Niyə? 2010-cu illərin pop ikonu “Mayhem” albomu ilə möhtəşəm geri dönüş edərək dinləyicilərinə və qlobal musiqi həvəskarlarına ehtiyacı olanı təqdim edib. Konseptual təqdimat və səhnə enerjisi onu önə çıxardı və sosial mediada geniş əks-səda yaratdı. Biz bu səbəbdən mükafatı Qaqanın layiqincə alacağına şübhə etmirik. Lakin sürprizlər hər zaman gözləniləndir.
“İlin Video Klipi” nominasiyasına gəldiyimiz zaman isə bizi bir çox sənət yüklü işlər qarşılayır.
Namizədlər: Ariana Qrande – “Brighter Days Ahead”, Billi Ayliş – “Birds of a Feather”, Kendrik Lamar – “Not Like Us”, Ledi Qaqa & Bruno Mars – “Die with a Smile”, Roze & Bruno Mars – “Apt.”, Sabrina Karpenter – “Manchild”
Bu kateqoriyada Billi Ayliş – “Birds of a Feather”, Ledi Qaqa & Bruno Mars – “Die With a Smile”, Ariana Qrande – “Brighter Days Ahead” video klipləri daha ön plana çıxır. Təxminimizcə bu titulu Ariana Qrande qazanacaq.
“İlin Mahnısı” isə “İlin Artisti” qədər ən çox səs gətirən nominasiyalardan biridir.
Namizədlər: Aleks Uarren – “Ordinary”, Billi Ayliş – “Birds of a Feather”, Qreysi Abrams – “I Love You, I’m Sorry”, Ledi Qaqa & Bruno Mars – “Die with a Smile”, Roze & Bruno Mars – “Apt.”, Teyt Mak Rey – “Sports Car”
Yetəri qədər gərgin mübarizə olsa da, qalibin Roze & Bruno Mars duetinin uğurlu “Apt.” mahnısı olacağını təxmin edirik. Mahnının yaş kateqoriyası nəzərə alınmadan böyükdən kiçiyə hər kəsə xitab etməsi, ritmik və dəyişkən tonu onu bu nominasiyada daha ön planda saxlayır.
“Ən Yaxşı Pop İfaçı” nominasiyasına gəldikdə isə iddialı adlarla üz-üzəyik.
Namizədlər: Ariana Qrande, Çarli XCX, Castin Biber, Lorde, Mayli Sayrus, Sabrina Karpenter, Teyt Mak Rey
Fikirlərimizə əsasən, Castin Biberin son albomu yetəri qədər gözlənilən uğuru əldə etmədi, Mayli Sayrus isə əsasən şəxsi imici hesabına ön planda oldu və son albomu yetərincə diqqət görmədi. Sabrina Karpenter və Çarli XCX bu nominasiyada ön plana çıxır.
Təxminlərimizə görə qalib bu iki müğənnidən biri olacaq. Yəqin ki, Sabrina Karpenter daha öndədir.
“Ən Yaxşı Albom” nominasiyasına gəlirik.
Namizədlər: Bad Banni – “Debí Tirar Más Fotos”, Kendrik Lamar – “GNX”, Ledi Qaqa – “Mayhem”, Morqan Uollen – “I’m the Problem”, Sabrina Karpenter – “Short n’ Sweet”, The Uiknd – “Hurry Up Tomorrow”
Heç şübhə etmədən deyə bilərik ki, burada bütün oxlar Ledi Qaqa – Mayhem albomuna işarə edir. Albomdakı uğurlu mahnılar və Qaqanın geri dönüşü onu məhz bu gecədə 12 nominasiyaya namizəd etmişdir. Bununla belə Sabrina Karpenterin qalibiyyət şansı da yüksəkdir.
“Ən Yaxşı Əməkdaşlıq” nominasiyası da gərgin mübarizə vəd edir. Bir çox uğurlu əməkdaşlığın yarışdığı gecədə…
Namizədlər: Beyli Zimmerman & Luk Koms – “Backup Plan”, Kendrik Lamar & SZA – “Luther”, Ledi Qaqa & Bruno Mars – “Die with a Smile”, Post Meloun feat. Bleyk Şelton – “Pour Me a Drink”, Roze & Bruno Mars – “Apt.”, Selena Qomez & Benni Blanko – “Sunset Blvd”
“Die with a Smile” (Ledi Qaqa & Bruno Mars) və “Apt.” (Roze & Bruno Mars) bu kateqoriyada ən güclü namizədlər olaraq önə çıxır. Hər iki əməkdaşlıqda Bruno Marsın yer alması xüsusilə diqqət çəkir. Mükafatı da bu iki namizəddən birinin alacağı qaçılmazdır, lakin dinləmə sayı, azarkeş reaksiyası və qlobal uğura görə qalibin Ledi Qaqa & Bruno Mars – “Die with a Smile” olacağını düşünürük.