Qorxu janrının ən tanınmış simalarından biri – Neve Kembel – illər sonra yenidən ekranlara qayıdır. “Scream” silsiləsinin yeddinci hissəsi – “Scream 7” – aktrisanın məşhur Sidni Preskott obrazını yenidən canlandırdığı filmdir. Bu dönüş, təkcə bir aktyorun rola qayıdışı deyil, həm də bir qadının öz keçmişi ilə barışmaq cəhdidir.
Yeni yayımlanan treylerdə Sidni sakit, ailəsindən uzaqda, təcrid olunmuş bir həyatda görünür. Amma bir gün telefon zəngi gəlir… O tanış, dərin və titrədən səs yenə eşidilir:
“Hello Sidney…. Do you miss me ?”
Bu dəfə Qoustfeys yalnız Sidnini deyil, onun qızını da hədəf alır. Sidni, bir ana kimi həm özünü, həm də övladını qorumağa çalışır. Qorxu artıq təkcə maskanın altında gizlənmir — o, Sidninin keçmişində, susqun gecələrində, unudulmaq istənilən xatirələrindədir.
Filmin rejissoru “Scream” silsiləsinin yaradıcısı olan Kevin Uilyamsondur. Bu, onun franşizada ilk rejissor işi olacaq. Uilyamsonun sözlərinə görə, bu dəfə məqsəd təkcə qorxutmaq deyil, tamaşaçını Sidninin hisslərinə daha yaxınlaşdırmaqdır:
“Biz bu dəfə Ves Krevenin irsini qoruyaraq, sadəcə qorxu yox, həm də insani dərinlik yaratmaq istəyirik. Hər birimizin içində bir Sidni var — keçmişi ilə barışmağa çalışan.”
Yeni “Skrim 7” həm nostaljini, həm də müasir dövrün texnoloji qorxularını birləşdirəcək. Film 27 fevral 2026-cı ildə dünya kinoteatrlarında nümayiş olunacaq
Mənbə: The Hollywood Reporter