Azərbaycan Kinematoqrafçılar İttifaqının nəzdində fəaliyyət göstərən 98-ci Kino Akademiyası Mükafatları (“Oscar”) üzrə Azərbaycan Film Seçim Komitəsi “Tağıyev: Neft” filmini ölkəmizin “Ən Yaxşı Beynəlxalq Bədii Film” kateqoriyası üzrə 98-ci Kino Akademiyası Mükafatlarına (2026) rəsmi namizəd kimi seçib.
Film Heydər Əliyev Fondu, Mədəniyyət Nazirliyi və Azərbaycan Respublikası Kino Agentliyinin (ARKA) dəstəyi ilə Bakı Media Mərkəzi tərəfindən istehsal olunub. Layihənin sponsorları sırasında Neqsol Holding, Kapital Bank, Bakcell və Norm şirkətləri yer alır.
Ekran əsəri Azərbaycanın iqtisadi və mədəni həyatında mühüm rol oynamış görkəmli sənayeçi, neft maqnatı və xeyriyyəçi Hacı Zeynalabdin Tağıyevin həyatını və irsini bədii film janrının imkanları ilə tamaşaçılara təqdim edir.
Azərbaycan Film Seçim Komitəsi bildirib ki, filmin Kino Sənəti və Elmləri Akademiyasına təqdim olunması ölkəmizin qlobal kino sənayesində mövqeyini möhkəmləndirmək, milli mədəni irsini və zəngin tarixini beynəlxalq auditoriyaya çatdırmaq baxımından mühüm addımdır.
Məlumat üçün qeyd edək ki, Kino Sənəti və Elmləri Akademiyası “Ən Yaxşı Beynəlxalq Bədii Film” kateqoriyası üzrə qısa siyahını 2025-ci ilin dekabrında, əsas nominasiyaları isə 2026-cı ilin yanvarında elan edəcək. 98-ci “Oscar” Kino Akademiyası Mükafatlarının təqdimetmə mərasimi isə 2026-cı ilin martında Los-Ancelesdə baş tutacaq.