2021-ci ilin noyabrında ABŞ-ın Hyuston şəhərində reper Travis Skottun təşkil etdiyi “Astroworld Festivalı”nda baş verən faciə musiqi sənayesində təhlükəsizlik standartlarını yenidən gündəmə gətirib. Tədbirdə yaranmış izdiham nəticəsində 10 nəfər həlak olub, yüzlərlə tamaşaçı müxtəlif dərəcəli xəsarətlər alıb.
Hadisədən sonra festivalın təşkilatçıları və Live Nation şirkəti ilə yanaşı, Travis Skotta qarşı 400-dən çox məhkəmə iddiası qaldırılıb. Ümumi təzminat tələbləri təxminən 2 milyard dollara yaxın olub. İfaçı cinayət məsuliyyətindən azad edilsə də, onun imicinə ciddi zərbə dəyib.
Faciədən sonra bir çox ölkədə konsert və festivallarda təhlükəsizlik tədbirləri gücləndirilib. Yeni protokollara əsasən tamaşaçı sıxlığı real vaxtda xüsusi nəzarət sistemləri ilə izlənəcək, məkanların maksimal tutumunun 70–80 faizinə qədər bilet satışı məhdudlaşdırılacaq, tədbir yerlərində əlavə tibbi briqadalar və təhlükəsizlik qüvvələri cəlb olunacaq. Həmçinin ifaçıların fövqəladə vəziyyətlərdə şouya fasilə verməsi müqavilələrdə öhdəlik kimi qeyd ediləcək.
ABŞ-da konsertlər üçün federal təhlükəsizlik standartı hazırlanır. Avropa İttifaqında böyük festivallarda “təhlükəsizlik meneceri”nin fəaliyyəti məcburi ola bilər. Böyük Britaniyada stadionlarda izdihamın süni intellektlə izlənməsi tətbiq olunmağa başlanıb. Avstraliya və Kanadada isə təşkilatçılar üçün əlavə sığorta və tibbi xidmət xərcləri məcburi edilib.
Mütəxəssislər bildirirlər ki, yeni qaydalar bilet qiymətlərinə birbaşa təsir göstərəcək. Təhlükəsizlik və sığorta xərclərinin artması səbəbindən ABŞ və Avropada festival biletlərinin qiyməti son iki ildə orta hesabla 15–20 faiz yüksəlib. Sponsorların rolu da artır, çünki təşkilatçılar əlavə maliyyə yükünü təkbaşına qarşılamaqda çətinlik çəkirlər.
Ekspertlər hesab edirlər ki, ifaçılar da tamaşaçıların təhlükəsizliyinə müəyyən qədər cavabdehdir. Bu səbəbdən müqavilələrə yeni bəndlər əlavə olunub. Son dövrlərdə Billi Ayliş və Adel kimi sənətçilər konsertlərində tamaşaçılar arasında problem yarandıqda şounu dayandıraraq təhlükəsizlik əməkdaşlarını köməyə çağırıblar.
Mütəxəssislərin fikrincə, yeni qaydalar konsertlərin əvvəlki azad atmosferini müəyyən qədər məhdudlaşdırsada, tamaşaçıların təhlükəsizliyi prioritet olaraq qalacaq. Gələcəkdə festival və stadion tədbirlərində dronlar, süni intellekt əsaslı izləmə sistemləri və daha sərt təşkilati protokollar geniş tətbiq olunacaq.