Uzun müddətdir ictimaiyyət qarşısında görünməyən Xalq artisti Flora Kərimova sosial şəbəkələrdə yeni görüntüsü ilə diqqət çəkib.
85 yaşlı sənətkar “Yolüstü” və “FoodMood” şirkətlərinin birgə hazırladığı reklam filmində rol alıb. Layihənin maraqlı məqamlarından biri reklamda Flora Kərimovanın illər öncə sevilən “Bir axşam taksidə” ifasının səsləndirilməsidir. Bu detal ekran işinə xüsusi nostalji ab-hava qataraq tamaşaçıları həm musiqi, həm də vizual baxımdan keçmişlə bu gün arasında səyahətə aparır.
Reklam filmində Xalq artisti retro üslubda bəzədilmiş avtomobildə yer alıb. Flora Kərimovanın ikonik obrazının müasir tərzdə təqdim edilməsi layihənin tamaşaçılar arasında böyük maraq doğuracağına işarədir.
“Yolüstü” və “FoodMood”un hazırladığı reklam yaxın günlərdə televiziya və rəqəmsal platformalarda yayımlanacaq.